प्रसिद्ध विडंबनकार संजय आहेर यांच्या विडंबन कवितांना विजयनगर येथे उत्स्फूर्त प्रतिसाद
भगूर/वार्ताहर :-
"विडंबन म्हणजे केवळ विनोद नसून, सामाजिक, सांस्कृतिक व धार्मिक क्षेत्रातील अनागोंदीवर कवितेच्या माध्यमातून अंजन घालून उचललेले एक सुधारणावादी पाऊल आहे," असे प्रतिपादन ज्येष्ठ कवी व विडंबनकार संजय आहेर यांनी केले.
विजयनगर येथील शहा गार्डन इस्टेटमधील विघ्नहर्ता गणेश मंडळाच्या वतीने आयोजित विशेष विडंबन कविता कार्यक्रमात ते बोलत होते.
सुमारे दोन तास रंगलेल्या या कार्यक्रमात संजय आहेर यांनी 'स्ट्रॉबेरी' तसेच 'आजकालची सामाजिक परिस्थिती' यांसारख्या विषयांवर मार्मिक व प्रभावी विडंबन कविता सादर करून उपस्थितांची दाद मिळवली. याच कार्यक्रमात कवी बाळासाहेब गिरी यांनी आई, मुलगी आणि वडील या कौटुंबिक नात्यांवर आधारित भावस्पर्शी कविता सादर केल्या.
मान्यवरांची उपस्थिती
कार्यक्रमाच्या सुरुवातीला अतिथींचे स्वागत स्वप्नील घोरपडे व स्वप्नील आव्हाड यांनी केले. या सोहळ्यास ज्येष्ठ नागरिक संघाचे अध्यक्ष दिलीप चव्हाण, कवी रवींद्र आहेर यांच्यासह सोसायटीतील अनेक नागरिक व मान्यवर मोठ्या संख्येने उपस्थित होते.
सदर कार्यक्रमाचे उत्कृष्ट सूत्रसंचालन व नियोजन प्रशांत कापसे यांनी केले. उपस्थितांच्या भरघोस प्रतिसादात हा काव्यसंध्येचा कार्यक्रम अतिशय उत्साहात पार पडला.